საქართველოს ბუნების მკვლევართა კავშირი „ორქისი" || Georgian Society of Nature Explorers "Orchis"
+995 599 77 52 37 ; +995 (032) 2 38 51 99
2022 წლის 24 ოქტომბერს ქ. თბილისში, სასტუმრო „ქორთიარდ მარიოტში“, ცირკულარული ეკონომიკისადმი მიძღვნილი მე-8 კონფერენცია – “განათლების როლი ცირკულარულ ეკონომიკაზე გადასვლის დაჩქარებასა და კლიმატის ცვლილებასთან გამკლავებაში” გაიმართება
2022 წლის 24 ოქტომბერს ქ. თბილისში, სასტუმრო „ქორთიარდ მარიოტში“, ცირკულარული ეკონომიკისადმი მიძღვნილი მე-8 კონფერენცია – “განათლების როლი ცირკულარულ ეკონომიკაზე გადასვლის დაჩქარებასა და კლიმატის ცვლილებასთან გამკლავებაში” გაიმართება, რომლის მიზანია ხელი შეუწყოს ცირკულარობაზე გადასვლის დაჩქარებას და ამ სისტემის ეფექტიანად დანერგვას საქართველოში.
კონფერენციის სამიზნე აუდიტორიას საქართველოს უნივერსიტეტები და სხვა საგანმანათლებლო დაწესებულებები წარმოადგენენ, რათა მათთან ერთად კიდევ ერთხელ იქნას განხილული რას წარმოადგენს ცირკულარული ეკონომიკა, რა კავშირშია იგი კლიმატის ცვლილებასთან, ცირკულარობაზე გადასვლაში და კლიმატის ცვლილებასთან გამკლავებაში განათლების სფეროს რა როლი აკისრია. ეს იქნება უმაღლესი განათლების სფეროსთვის განკუთვნილი მეორე ღონისძიება, რომლის მოწყობის თხოვნით მათ 2022 წლის მარტში, მათთვისვე ორგანიზებული ცირკულარული ეკონომიკის მე-6 კონფერენციის შემდეგ მოგვმართეს, რადგანაც წინა ღონისძიებამ დიდი ინტერესი გამოიწვია და მის შედეგად დაიწყო მსჯელობა, საგანმანათლებლო პროგრამებში ცირკულარობის პრინციპები რა სახით უნდა შევიდეს და სასწავლო პროგრამების მეშვეობით ცირკულარული ეკონომიკის საკითხებზე ინფორმაციის მიწოდება როგორ უნდა მოხდეს.კონფერენციაზე მთავარი მომხსენებელი იქნება დ-რი დარიუშ ედვარდ პრასეკი, მდგრადი ფინანსების, გარემოს დაცვის, სოციალური, მმართველობისა და ცირკულარული ეკონომიკის საკითხების საერთაშორისო ექსპერტი, გაეროს ცირკულარული ეკონომიკის მრჩეველთა საბჭოს წევრი, ევროპის რეკონსტრუქციისა და განვითარების ბანკის (EBRD) გარემოს დაცვისა და მდგრადი განვითარების დეპარტამენტის ყოფილი აღმასრულებელი დირექტორი, ამერიკათაშორისი განვითარების ბანკის (IDB Invest) განვითარების პროექტების დამოუკიდებელი ექსპერტი, რომელიც, ცირკულარული ეკონომიკის შესახებ ძირითად ინფორმაციასთან ერთად, მცირე და საშუალო ზომის საწარმოებში ცირკულარობის პრინციპების დანერგვის პრაქტიკულ მაგალითებს წარმოადგენს და ამ პროცესში უნივერსიტეტებს კონკრეტულ როლზე ისაუბრებს.კონფერენცია ორგანიზებული იქნება საქართველოში ცირკულარული ეკონომიკის თაობაზე ცნობიერების ამაღლების მიმდინარე პროგრამის ფარგლებში, რომელსაც საზოგადოებრივი ორგანიზაცია საქართველოს ბუნების მკვლევართა კავშირი „ორქისი“, შვედეთის მთავრობის მხარდაჭერით ახორციელებს. ამ პროგრამის ფარგლებში 2019-2022 წლებში ჯამში რვა კონფერენცია მოეწყო, რომელთა მონაწილენი იყვნენ საკვანძო დაინტერესებული და გარდაქმნის პროცესის ხელშემწყობი მხარეები, მათ შორის ცენტრალური, რეგიონული და მუნიციპალური ხელისუფლება, პოლიტიკის შემქმნელები და პარლამენტარები, საფინანსო სექტორი, ზოგადად ბიზნესსექტორი, მათ შორის საქართველოსა და აზერბაიჯანის მცირე და საშუალო ზომის საწარმოები, ასევე საქართველოს უნივერსიტეტები და სხვა საგანმანათლებლო დაწესებულებები.აღნიშნული სატრენინგო პროგრამა მომზადდა შვედეთის მთავრობის დაფინანსებით და მისი ამოცანაა დაინტერესებულ მხარეთა ფართო სპექტრის ცნობიერების ამაღლება ცირკულარული ეკონომიკის საკითხებზე და მათთვის რეკომენდაციების მიცემა, ქვეყნის ეკონომიკის სხვადასხვა დონეზე ცირკულარული ეკონომიკის პრინციპების დანერგვა როგორ შეიძლება დაჩქარდეს. განსაკუთრებული ყურადღება ეთმობა ისეთ რეკომენდაციებს, როგორიცაა: ცირკულარული ეკონომიკის პროექტების დაფინანსების პირობების გაუმჯობესება, ხელშემშლელი ფაქტორების აღმოფხვრა, სტიმულირების საჭიროების მქონე ძირითადი სფეროების გამოვლენა, სხვადასხვა დარგის ექსპერტების მომზადება.• ცირკულარული ეკონომიკა წარმოებისა და მოხმარების მოდელია, რომელიც არსებული მასალებისა და საქონლის საზიარო სარგებლობას, იჯარას, მრავალჯერად გამოყენებას, შეკეთებას, სრულად განახლებას და გადამუშავებას ითვალისწინებს. ამ გზით საქონლის სასიცოცხლო ციკლი ხანგრძლივდება და ნარჩენები მინიმუმამდე მცირდება.
• ცირკულარული ეკონომიკა ეკონომიკური განვითარებისადმი სისტემური მიდგომაა, რომელსაც სარგებელი როგორც ბიზნესისთვის, ასევე საზოგადოებისა და გარემოსთვის მოაქვს. ცირკულარული განვითარება სოციალური და გარემოსდაცვითი კუთხით პასუხისმგებლიანი წარმოება-მოხმარების მოდელია, რომელიც მდგრადი საზოგადოების ჩამოყალიბებას ითვალისწინებს.
• ცირკულარული ეკონომიკის კონცეფცია ყურადღებას იპყრობს მომხმარებლობის დონისა და რესურსების მოხმარების ზრდის გამო, რაც მოსახლეობის სწრაფი მატებითა და ცხოვრების სტანდარტის ამაღლებითაა გამოწვეული. ეს ახალი ეკონომიკური მოდელია, რომელიც ეფექტიანი მწვანე განვითარებისაკენ მიმავალი მდგრადი გზაა და რომელსაც კლიმატის ცვლილებასთან ბრძოლაში შესამჩნევი წვლილის შეტანა შეუძლია.
• სხვა სისტემური ცვლილებების მსგავსად, ცირკულარულ ეკონომიკაზე გადასასვლელად სისტემის რამდენიმე კომპონენტი ერთდროულად უნდა შეიცვალოს და ამისათვის დაინტერესებულ მხარეთა ერთობლივი მოქმედებაა საჭირო. უნივერსიტეტებსა და სხვა საგანმანათლებლო დაწესებულებებს ცირკულარული ბიზნესების შექმნაში მნიშვნელოვანი წვლილის შეტანა შეუძლიათ, რადგანაც მათ სხვადასხვა დარგის ექსპერტები უნდა მოამზადონ, რომლებიც დასაბუთებული, ინვესტირებისათვის მიმზიდველი, განვითარების გრძელვადიან ხედვასა და ცირკულარულ ეკონომიკაზე გადასვლის სტრატეგიაზე მორგებული ცირკულარული ბიზნესმოდელებისა და პროექტების სწორად განსაზღვრისათვის, კონცეპტუალური დამუშავებისათვის და განვითარებისათვის არიან საჭირო. ამ ექსპერტებს პროექტების ეკონომიკური მომგებიანობისა და საინვესტიციო მიმზიდველობის თაობაზე რჩევები მოცემა და აღნიშნული მაჩვენებლების გაუმჯობესება შეეძლებათ; ამას გარდა, მათ შეეძლებათ მიწოდების ჯაჭვში ურთიერთთანამშრომლობის სქემები თვალნათლად წარმოაჩინონ, რათა ცირკულარობის პრინციპების გამოყენება სრულად მოხდეს და ცირკულარული ბიზნესმოდელები საუკეთესო ვარიანტად იქცეს კომპანიებისათვის, რომლებიც მზად არიან კონკურენტული უპირატესობა იმგვარად მოიპოვონ და თავიანთი ბაზარი ისე შეინარჩუნონ, რომ მათი მიზნები საზოგადოებრივ მიზნებთან იყოს თანხვედრაში.
• ცირკულარული ეკონომიკა მხოლოდ რჩეულთა პასუხისმგებლობას არ განეკუთვნება. მდგრადი მომავლის შექმნაში მონაწილეობის უფლება ყველა ჩვენგანს გააჩნია. ცირკულარული ეკონომიკის შესახებ განათლების მიზანი ცირკულარული ეკონომიკის საკითხების მცოდნე სპეციალური ექსპერტების მომზადება არ არის. მომავალში ყველა ჩვენთაგანს დაგვჭირდება ცირკულარული ეკონომიკის პრინციპებისა და საფუძვლების სიღრმისეული ცოდნა და ჩვენს პროფესიულ სფეროში ცირკულარული გადაწყვეტილებების დანერგვა.
ცირკულარული ეკონომიკისადმი მიძღვნილი მე-8 კონფერენცია ორგანიზებულია გარემოს დაცვისა და სოფლის მეურნეობის სამინისტროსა და საქართველოს ბუნების მკვლევართა კავშირის „ორქისი“ ერთობლივი ძალისხმევით, შვედეთის მთავრობის მიერ დაფინანსებული ცირკულარული ეკონომიკის პროგრამის ფარგლებში, რომელსაც სბმკ „ორქისი“ გარემოს დაცვისა და სოფლის მეურნეობის, ეკონომიკისა და მდგრადი განვითარების, რეგიონული განვითარებისა და ინფრასტრუქტურის, განათლებისა და მეცნიერების მხარდაჭერით ახორციელებს.