გამწვანების აქცია ქ. კასპში და კასპის მუნიციპალიტეტის სოფლებში

2022 წლის 6 აპრილს ქ. კასპში და კასპის მუნიციპალიტეტის სოფლებში (ხოვლე, ქვემო გომი და კალოუბანი) საქართველოს ბუნების მკვლევართა კავშირი „ორქისი“-ს ორგანიზებით ჩატარდა გამწვანების აქციები 50-ზე მეტ ლოკაციაზე, პროექტის „დავიცვათ საქართველოს სისუფთავე“ ფარგლებში, რომელიც შვედეთის მთავრობის დაფინანსებით ხორციელდება.

ამ ღონისძიებისთვის სბმკ „ორქის“-მა შპს „საქართველოს ნერგები“-დან შეისყიდა შემდეგი ნერგები: კავკასიური ფიჭვი- 75, აკაკის ხე – 15, მინდვრის ნეკერჩხალი – 15, ზეთისხილის – 30, კიპარისი – 10 და საბორდიურე ტუია – 110. ზემოაღნიშნული სახეობების სულ 255 ძირი ნერგი დაირგო კასპის მუნიციპალიტეტში სხვადასხვა ლოკაციებზე. კერძოდ, კასპის N4 და N5 საბავშვო ბაღების ეზოებში. ასევე სოფლებში ხოვლე, კალოუბანი და ქვემო გომი.

ქ. კასპში ჩატარებულ გამწვანების აქციებში, სბმკ „ორქისის“ წარმომადგენლებთან ერთად, აქტიურად მონაწილეობდნენ კასპის მერი ბ-ნი ვახტანგ მაისურაძე, მერის მოადგილე ბ-ნი ზურაბ კოპაძე, საკრებულოს თავმჯდომარე ბ-ნი შოთა ბეგლარაშვილი, საზოგადოებსთან ურთიერთობის სამსახურის წარმომადგენელი ქ-ნი დალი კორკომაშვილი, კასპის N3 საჯარო სკოლის ეკოკლუბი ,,ლორაქსი”- და სოფელ ხოვლეს სჯარო სკოლის პროექტის „ხელი შევუშალოთ გაუდაბნოებას“ წევრები. სკოლისა და სკოლამდელი აღზრდის დაწესებულებების დირექტორები, პედაგოგები მოსწავლეები და სოფლების ხოვლეს, კალოუბნის და ქვემო გომის მოსახლეობა, მათ შორის იძულებით გადაადგილებული პირები.

საქართველოს ბუნების მკვლევართა კავშირის „ორქისის“ მიერ ჩატარებული გამწვანების აქციები, მცენარეული საფარის, ტყის და ჰაბიტატების აღდგენის ქმედებები მდგრადი განვითარების მიზნების შესრულებასაც ემსახურება. მდგრადი განვითარების მიზნები ფართო სპექტრისაა და პასუხობს მდგრადი განვითარების ურთიერთდაკავშირებულ ელემენტებს: ეკონომიკური ზრდა, სოციალური ინკლუზია (ანუ ჩართულობა) და გარემოს დაცვა. ამ ჭრილში, ბიომრავალფეროვნების დაცვის, კონსერვაციის, დეგრადაციის თავიდან აცილების და აღდგენის ქმედებები ის მნიშვნელოვანი კომპონენეტებია, რომელთა გარეშე წარმოუდგენელია მდგრადი განვითარება და მდგრადი განვითარების მიზნების მიღწევა, რაც დიდწილად ბიომრავალფეროვნებისაგან მიღებული მრავალმხრივი და უმნიშვნელოვანესი ეკოსისტემური სერვისების შენარჩუნების გზითაა შესაძლებელი.

ზოგადად, ბიოაღდგენის და ხეების დარგვის ღონისძიებები, კლიმატის ცვლილების შემცირების ერთ-ერთ, ყველაზე უფრო ეფექტურ ინსტრუმენტს წარმოადგენს. ხეები, შთანთქავენ რა კლიმატის ცვლილების გამომწვევ ერთ-ერთ ძირითად აირს – ნახშირორჟანგს, ამცირებენ მის კონცენტრაციას ატმოსფეროში და შესაბამისად, კლიმატის ცვლილების დონეს. ამიტომაცაა, რომ მსოფლიო გარემოსდაცვითი (და არა მარტო) საზოგადოება დიდ მნიშვნელობას ანიჭებს ზოგადად ტყეების აღდგენას კლიმატის ცვლილებასთან ბრძოლის თვალსაზრისით და ამიტომაცაა განსაკუთრებული სარგებლის მომტანი ხეების დარგვისა და ტერიტორიის აღდგენა/გატყიანების საქმიანობა.

პროექტს „დავიცვათ საქართველოს სისუფთავე“ ახორციელებს არასამთავრობო ორგანიზაცია საქართველოს ბუნების მკვლევართა კავშირი „ორქისი” შვედეთის მთავრობის ფინანსური უზრუნველყოფით, საქართველოს გარემოს დაცვისა და სოფლის მეურნეობის, რეგიონული განვითარებისა და ინფრასტრუქტურის, ეკონომიკის და მდგრადი განვითარების, განათლების და მეცნიერების მხარდაჭერით, საქართველოს მყარი ნარჩენების მართვის კომპანიასთან და გარემოსდაცვითი საინფორმაციო და განათლების ცენტრთან თანამშრომლობით.