დარგვის აქცია მცხეთის მუნიციპალიტეტში 2021 წლის 23 მარტს

2021 წლის 23 მარტს, მცხეთის მუნიციპალიტეტის სოფელ წილკანში, საქართველოს ბუნების მკვლევართა კავშირი „ორქისი“-ს ორგანიზებით, პროექტის „დავიცვათ საქართველოს სისუფთავე“ ფარგლებში, გამწვანების აქცია ჩატარდა. ამ ღონისძიებისათვის სბმკ „ორქის“-მა შპს „საქართველოს ნერგები“ – დან შეისყიდა ბროწეულის 10, ჰიმალაის კედარის 4, იფანის 10, კავკასიური ფიჭვის 20 და 10 ძირი ქართული ნუშის ნერგები.

ადგილობრივი სახეობის 54 ძირი ნერგი დაირგო სოფელ წილკნის საჯარო სკოლის ეზოში. გამწვანების აქციაში სბმკ „ორქისი“-ს წარმომადგენლებთან ერთად, მონაწილეობდნენ მცხეთა-მთიანეთის რეგიონის მაჟორიტარი დეპუტატი ბ-ნი თედო კახუაშილი, მერიის წარმომადგენელი ბ-ნი თამაზ ანდრიაშილი, საჯარო სკოლის დირექტორი ქ-ნი მაია ცხვედიანიძე, სკოლის ადმინისტრაციის წარმომადგენლები, მასწავლებლები და მოსწავლეები. აღსანიშნავია ის გარემოება, რომ წილკნის საჯარო სკოლის მოსწავლეების ნაწილი არიან იძულებით გადაადგილებული პირები.

მცხეთის მუნიციპალიტეტის, სოფელ წილკნის საჯარო სკოლაში გამწვანების აქცია ჩატარდა პანდემიასთან დაკავშირებით საქართველოს მთავრობის მიერ დადგენი;ლი წესებისა და შეზღუდვების სრული გათვალისწინებით, რომლის დროსაც დაცული იყო სოციალური დისტანცია და კანონით გათვალისწინებული სხვა შემზღუდავი ღონისძიებები.

ზოგადად, პროექტის, „დავიცვათ საქართველოს სისუფთავე“, ფარგლებში ჩატარებული გამწვანების აქციები, მცენარეული საფარის, ტყის და ჰაბიტატების აღდგენის ქმედებები მდგრადი განვითარების მიზნების შესრულებასაც ემსახურება. მდგრადი განვითარების მიზნები ფართო სპექტრისაა და პასუხობს მდგრადი განვითარების ურთიერთდაკავშირებულ ელემენტებს: ეკონომიკური ზრდა, სოციალური ინკლუზია (ანუ ჩართულობა) და გარემოს დაცვა. ამ ჭრილში, ბიომრავალფეროვნების დაცვის, კონსერვაციის, დეგრადაციის თავიდან აცილების და აღდგენის ქმედებები ის მნიშვნელოვანი კომპონენეტებია, რომელთა გარეშე წარმოუდგენელია მდგრადი განვითარება და მდგრადი განვითარების მიზნების მიღწევა, რაც დიდწილად ბიომრავალფეროვნებისაგან მიღებული მრავალმხრივი და უმნიშვნელოვანესი ეკოსისტემური სერვისების შენარჩუნების გზითაა შესაძლებელი.

ზოგადად ბიოაღდგენის და ხეების დარგვის ღონისძიებები, კლიმატის ცვლილების შემცირების ერთ-ერთ, ყველაზე უფრო ეფექტურ ინსტრუმენტს წარმოადგენს. ხეები, შთანთქავენ რა კლიმატის ცვლილების გამომწვევ ერთ-ერთ ძირითად აირს – ნახშირორჟანგს, ამცირებენ მის კონცენტრაციას ატმოსფეროში და შესაბამისად, კლიმატის ცვლილების დონეს. ამიტომაცაა, რომ მსოფლიო გარემოსდაცვითი (და არა მარტო) საზოგადოება დიდ მნიშვნელობას ანიჭებს ზოგადად ტყეების აღდგენას კლიმატის ცვლილებასთან ბრძოლის თვალსაზრისით და ამიტომაცაა განსაკუთრებული სარგებლის მომტანი ხეების დარგვისა და ტერიტორიის აღდგენა/გატყიანების საქმიანობა.

პროექტს-„დავიცვათ საქართველოს სისუფთავე“ ახორციელებს არასამთავრობო ორგანიზაციათა კონსორციუმი: საქართველოს ბუნების მკვლევართა კავშირი „ორქისი”, დავიცვათ საქართველოს სისუფთავე და საქართველოს მწვანეთა მოძრაობა/დედამიწის მეგობრები-საქართველო, შვედეთის მთავრობის ფინანსური უზრუნველყოფით, საქართველოს გარემოს დაცვისა და სოფლის მეურნეობის, რეგიონული განვითარებისა და ინფრასტრუქტურის, ეკონომიკის და მდგრადი განვითარების, განათლების, მეცნიერების, კულტურისა და სპორტის სამინისტროების მხარდაჭერით, საქართველოს მყარი ნარჩენების მართვის კომპანიასთან და გარემოსდაცვითი საინფორმაციო და განათლების ცენტრთან თანამშრომლობით.