საქართველოს ბუნების მკვლევართა კავშირი „ორქისი" || Georgian Society of Nature Explorers "Orchis"
+995 599 77 52 37 ; +995 (032) 2 38 51 99
ახალციხის და ასპინძის მუნიციპალიტეტებში სტიქიური ნაგავსაყრელების ტერიტორიების ნიადაგის ბიორემედიაციის აქცია
2020 წლის 22 და 23 ივლისს, სამცხე ჯავახეთის რეგიონში, ქ. ახალციხეში ორ ლოკაციაზე ( პოლიკლინიკის და დევნილთა დასახლების მიმდებარე ტერიტორიებზე) და ქ. ასპინძაში ერთ ლოკაციაზე ( ხიდის მიმდებარე ტერიტორია), პროექტის „დავიცვათ საქართველოს სისუფთავე“ ფარგლებში, ბუნების მკვლევართა კავშირის – „ორქისის“ ინიციატივით, ჩატარდა სტიქიური ნაგავსაყრელების ტერიტორიების ნიადაგის ბიორემედიაციის აქციები, რომელშიც მონაწილობდნენ ახალციხის და ასპინძის მუნიციპალიტეტების ზედამხედველობისა და დასუფთავების სამსახურების თანამშრომლები, ასევე ადგილობრივი მოსახლეობა. სულ დაახლოებით 25 ადამიანი.
აქციის ფარგლებში მოხდა, ახალციხეში და ასპინძაში არსებული სტიქიური ნაგავსაყრელებიდან დაბინძურებული ნიადაგის ნიმუშების აღება ქიმიური ანალიზისთვის, შემდგომ დასუფთავება და ამ ტერიტორიების ნიადაგის ბიორემედიაცია საქართველოში არსებული იაფი ნედლეულის – კლინოპტილოლითის მეშვეობით, რომლის ნაგავსაყრელის ნიადაგთან შერევის შედეგად (გარკვეული დროის პერიოდში) მოცემული ნიადაგის ხარისხი და ქიმიური შემადგენლობა უმჯობესდება, რაც შემდგომში საშუალებას გვაძლევს ამ ტერიტორიის გამწვანების და მაზე სხვადასხვა ნერგების განთავსება-დარგვის. შედეგად, არა მხოლოდ მოსუფთავებულ, არამედ აღდგენილ ტერიტორიას ვიღებთ.
პროექტის „დავიცვათ საქთველოს სისუფთავე“ მიზნებია გარემოს დაცვის საკითხებში გაცნობიერებული თაობის აღზრდა და მუნიციპალური ნარჩენებით დაბინძურების (40%) და სათბურის აირების გაფრქვევების (10%) შემცირება საქართველოში ასევე სამიზნე ტერიტორიების დაბინძურებულ ნიადაგში მძიმე ლითონების შემცველობის შემცირება 10%-ით, 2023 წლისთვის.
პროექტს – „დავიცვათ საქართველოს სისუფთავე“- ახორციელებს არასამთავრობო ორგანიზაციათა კონსორციუმი: საქართველოს ბუნების მკვლევართა კავშირი „ორქისი”, დავიცვათ საქართველოს სისუფთავე და საქართველოს მწვანეთა მოძრაობა/დედამიწის მეგობრები–საქართველო, შვედეთის მთავრობის ფინანსური უზრუნველყოფით, გარემოს დაცვისა და სოფლის მეურნეობის და რეგიონული განვითარებისა და ინფრასტრუქტურის სამინისტროების მხარდაჭერით, ასევე შ.პ.ს. „საქართველოს მყარი ნარჩენების მართვის კომპანია“-სთან თანამშრომლობით.