საქართველოს ბუნების მკვლევართა კავშირი „ორქისი" || Georgian Society of Nature Explorers "Orchis"
+995 599 77 52 37 ; +995 (032) 2 38 51 99
დარგვის აქცია თბილისში
2019 წლის 31 ოქტომბერს გაიხსნა შვედეთ-საქართველოს მეგობრობის მწვანე კუთხე, რომელიც სიმბოლოა შვედეთს-საქართველოს თანამშრომლობისა და ჩვენი სურვილისა, რომ პლანეტა სუფთა და მწვანე გავხადოთ, რადგანაც იგი ყველას საერთო სახლია.
ეს მწვანე კუთხე შვედეთის სასწავლებლების კურსდამთავრებულების და, ზოგადად, მოქალაქეების შეხვედრის ადგილი იქნება, სადაც მათ აზრებისა და ღირებულებების ურთიერთგაზიარება და მათთვის აქტუალური საკითხების განხილვა შეეძლებათ, სადაც მათ დახვდებათ ეკოლოგიურად სუფთა გარემო და ბავშვების სათამაშო ზონა, მათ შორის პეპის სახლი.
საქართველოს ბუნების მკვლევართა კავშირი „ორქისი“-ს წევრებმა, შვედეთის მიერ დაფინანსებული პროექტის „დავიცვათ საქართველოს სისუფთავე“ ფარგლებში, შვედეთის სასწავლებლების კურსდამთავრებულთა საქართველოს ქსელსა და მერიასთან თანამშრომლობით, ვარკეთილის პარკში მდებარე საქართველო-შვედეთის მეგობრობის მწვანე კუთხეში 150 ხის ნერგი დარგო (ნაძვი, ბზა, ფიჭვი, ნეკერჩხალი). აღნიშნული ნერგები დაირგო აგრეთვე, ვარკეთილის პარკის მიმდებარე ტერიტორიაზე, რომელიც განხორციელდა თბილისის მუნიციპალიტეტის საკრებულოსთან მჭიდრო თანამშრომლობით.
ღონისძიებაში მონაწილეობდნენ შვედეთის ელჩი საქართველოში მისი აღმატებულება ულრიკ თიდესტრომი, შვედეთის საერთაშორისო განვითარებისა და თანამშრომლობის სააგენტოს ხელმძღვანელი ბ-ნი ერიკ ილლესი, ქ. თბილისის მერი ბ-ნი კ. კალაძე, მერის მოადგილე ქ-ნი მ. ბითაძე, გარემოს დაცვის საქალაქო სამსახურის ხელმძღვანელი ბ-ნი გ. გიგაშვილი, თბილისის საკრებულოს წევრი ბ-ნი რ. სოხაძე და პროექტის „დავიცვათ საქართველოს სისუფთავე“ პარტნიორი არასამთავრობო ორგანიზაციების წარმომადგენლები.
როგორც ურბანულ, ასევე ბუნებრივ გარემოში თითოეული ადამიანის მიერ დარგული ერთი ხეც კი სამომავლოდ განუზომელი სარგებლის მომტანი შეიძლება გახდეს. ტყეები კლიმატის ცვლილების შემცირების ერთ-ერთი ყველაზე უფრო ეფექტური ინსტრუმენტია. ბიოაღდგენის ღონისძიებები სათბურის აირების გაფრქვევას ამცირებს. ხეები, შთანთქავენ რა კლიმატის ცვლილების გამომწვევ ერთ-ერთ ძირითად აირს – ნახშირორჟანგს, ამცირებენ მის კონცენტრაციას ატმოსფეროში და, შესაბამისად, კლიმატის ცვლილების დონეს. ასეთი ღონისძიებების მეშვეობით პროექტი „დავიცვათ საქართველოს სისუფთავე“ მნიშვნელოვან წვლილს შეიტანს მდგრადი განვითარების მიზნების განხორციელებაში.
პროექტის „დავიცვათ საქართველოს სისუფთავე“ ფარგლებში დაგეგმილია ბიო-აღდგენის საქმიანობის ხელშეწყობა და განხორციელება, მათ შორის 16 ჰა დასუფთავებულ ტერიტორიაზე ხისა და ბუჩქების ადგილობრივი სახეობების (16 000 ნერგი) ნერგების დარგვა საქართველოს სემიარიდულ რეგიონებში, რაც ქვეყნის ამ რეგიონებში გაუდაბნოების პროცესის შემცირებას შეუწყობს ხელს.
პროექტს – „დავიცვათ საქართველოს სისუფთავე“- ახორციელებს არასამთავრობო ორგანიზაციათა კონსორციუმი: საქართველოს ბუნების მკვლევართა კავშირი „ორქისი”, დავიცვათ საქართველოს სისუფთავე და საქართველოს მწვანეთა მოძრაობა/დედამიწის მეგობრები–საქართველო, შვედეთის მთავრობის ფინანსური უზრუნველყოფით.